МАЩИЛУВУ

На усса махIлалий яхъанай дия, цамур шярава дуркIун, миналул хьусса дугьарасса щарсса.

Ганин Вихьулла -Бава учайва.

Мискинсса щарсса дия.

Хъу дакъая, лухччи дакъая.

Яхъанайгу дия аьвсса хьулу -чIавахьулу бусса лаякъатраву.

Багьлух ппал дюхлай, гайннуя ххаллу дуллай, варсул уссал чIанну щашлай, зунттуя бувсса явш бахлай, чухъри щащлай дикIайва.

Байчаранал кIиссурттал къепри шацI хьуну, датIрадикIуйн багьну, ххаллу дуллан, ккургъ тIун, зукка канил дугьан къашай тIий, хIинча ва дарваггу хъарайн бувтун, лухччайх дуклан дикIайва, бюруврал, жигурал къар дан, урттил бя батIин.

Жяматрай ссуттихунмай бюру хъямала бичайва.

Ми гьантрай, аьрччаманай мурчIима тIиссакссагу, халкь буккайва цанма бюру бан.

Цайми шанурдая бизаннин, ттуккуксса къаргу мукьах рирщуну, Вихьулла -Бава шярахун дияйва.

Бюру бурхIайн къакьутIланшиврул, къутта дурну, дарваг бакIрайх лаххайва.

Чурххаву буцири оь ганил лажиндаравун бавтIун чIалан бикIайва.

Амма кIинттул, щалла къар тавлувун личIирчагу, къатта гъили бан къашайва.

Мунихлуну ганил бурхIая ххячара -баркьут хIура къабайва.

КIяла аьрщарай хIулувхIусса, цичIав къадуртсса чIанкъатлува дякъил хIахI най чIалан бикIайва.

ПуркIурал къатта бувцIукун, чара ция, гай буккан нуз тIитIин багьайва, бявкъусса гьавагу, аждагьа кунма, къатлувун ххяххайва.

ЛухIисса туннурду чIалачIисса Бавал каругу цIу дирхьусса тавлул хьхьичIун дугьайва.

ЦIу хIала дуллалаврил лухIисса, мицIгу ччувччусса къуштIи ттуршайн цIунилгу даву дияйва.

Ганих цIу хIала дуркун, гъилисса хIахI симандалувух бищайва.

ЦIараву, кIирисса луххаву бувччуну бикIайва шайкун савсъсса, къарихъал барачатссар учайсса, шагьнал хъюру шахьан дирхьусса бархъаллал тIахIунттул гъаду.

Ганиву хъюру ххуйну пагь дуккайва.

Чанссарагу дакI гъили дан къушлий махъ бусанмавагу уссания тIий дикIайва га.

Дуссухун ганичIан цучIав къаучIайва.

ЧIяру къахьун тIий, цурдагу цайминначIан къалагайва.

Бизарсса, цивунна цурда къалаглагисса кунмасса оьрму бутлай дия Вихьулла -Бава.

Хъунмасса гъирарай вичIи дишайва мизитрал минаралия мюталиннал тIутIисса акварданух, ссалахIрах.

Хьхьурай тIурча, чIанкъатлувун хъаттирайн бувтсса кьалкьул шанийгу уттудирхьуну, чуллахун кьутIлатIисса кьалкьигу шиха тихун, тиха шихун гьан буллай, дуклай дикIайва чIирину дунара буттал, ниттил цинна лахьхьин дурсса дуаьртту.

БувчIлай бувчIин, хъирив лаллай лаян къашайсса зад ца бия -чуври, ци увссар хIалтIилухун лавгсса лас, чун акъа хьуссар га?

Та -унугу укканхьуви, учIанхьуви тIисса умудгу къакьукьайва.

Дукралун чIяруну лархьхьу накь дайва.

ДикI хIаласса дуканмур тIурча, хъинну чанну шайва, мугу -мизитраву цадакьалун дикI дарчIусса чIумал.

Шанма шагьигу канил бувгьуну, инсаннан бучIан тIимур бувчIайсса шяраваллил аьлимчуначIан ларгун, бувчIин буллан дикIайва.

Дияйва ганил ялун дакI таза дуккан дансса чIуннугу -шяраву чанна бакъа къашайва га дакъасса хъатIи -балай тIун пагьил дия.

Амма бивкIулий зума къаучайва.

-На нара щалла зумара, -тIун дикIайва га.

Бавал къатлуй кьункьула -кьун къадикIайва.

Цурда шардату нанийни, дарвазалий ацци дахIайва.

АхIъяна хIаядакъу увххун, ци -дунугу ларсун лякъирча, цIухлай махIлалийх дуккайва.

ЦучIав мукIру къахьурча, шанбачIулийнгу дурккун, биялсса зай учайва.

Бавал зай бацIайссархха, цу авлия иявав га цахунна дагьан дурма тIун бикIайва шяраву.

Дяркъусса кIинтнил кьинирду бавал зумащарнийсса хъун дакъасса, гьарайзу Саэдлул яттимащилуву гьан дайва.

Гивун бакьайва залуннал ва цайминнал чIяву бакъасса ятту.

КIюрххил гай канаки бан лухччинийн буккан буллалийни, гайннущал кьатIув ххяххайва махакрал рангсса ца цамургу ттурзан.

Гай бикIайва гужну тIанкI учайсса къучагътал -чIакри.

Янхьа тIий, гива ришлан дикIайва яттил щулуврал кьанкь.

ЧIалликкутIрагу дакъасса мащилуву цIан дикIайва.

Мунихлуну, лухIи навт бувтIусса кIива беса чирахърал мицIлийн пилта хIисаврай лиркIусса ацци ччурччутари, къяцIух ларай дуккан дуллай бикIайва.

Гивун батIайва бава кунмасса хъами.

Кьинигу гьан дайва гъелисса мащилуву.

КувнначIату кувнначIан тIанкIа тIий, кьацIа тIий бикIайва чIакри.

ЧIаврдайн, дарвачирттайн, ссурссурдайн ххяп -ххяпгу тIий, тIахIни гъаргъукун, гания лирчIсса чIануя дурсса ччюртIирдаву зукригу гъур -гъуртIи дуллай, ккургъанна дуллай бикIайва хъами.

-Яттуния нукIува лавгунни, вай кьюртIив ттигу шиккува ци дуллалиссар?

-дяъвай бикIайва гай чIакрахун, ккалазайлия зурчIай тIисса зуккагу гьаваллаву гьанагьи дуллай.

Аьдат дия мащилувун бавтIминнал ци -бунугу хIазсса, цанма ккавксса, бавсса зад бусайсса.

Мунин манеъ щилчIав къадайва.

Яржагу бивну, цинмагу бусанмур дакIнийн багьлай бакъахьурча, хъирив кьини бусан куну, кьабитайва, ягу цихлува цаманахь буси учайва.

Хавар бусан яржа Бавайн бивну бия.

Амма дайдишин анавар дуклай дакъая.

-Бавай, -увкуна, чIирайн ттиликIгу рирщуну, къургъ тIисса цаннил, -бусила, цукунсса ци кьадарданулла ина Вихьлияту жул шяравун дуртсса?

-Буния бусанна, -увкуна ганил, -амма ттун къакIулли ссаяту дайдишинтIиссарав.

Хъинни, дакIний ливчI -ливчIмур бусаннача.

На бияв нитти -буттал ца бакъа бакъасса душ.

БакIрал ххуйсса бухьунссияв, янил къахьун тIий, ккавктари, хьунабавкьутари, хъуни хъаннил, ттухгу бурувгун, пув -пув учайва.

Жагьилшиврувун бувххукун, ххуйну балай учингу лавхьхьуна.

Цавайннал хъатIул мажлисрай тямаданал на цала хьхьичIун бучIан бувну, амрурив, тавакъюрив бувна, хъинсса нитти -буттал душ, уча ва наврузбаг хъун ан ца шанма махъ балайлул куну.

На ниттил навалу, цурда архIал дакъа, чунчIав итакъабакьайвав.

Ганих бурувгссияв.

Уча тIий, бакIрал гьим дуруна.

Ясаулналгу гарацIана ттул кIунттивун ччергъилу дириян дуруна.

На увкуссия.

Къаччиналгу, ччиналгу

Цанма ччимур учача,

Вил уттасса хъачIунттах

Буруглайнма бикIара.

Гьантта зурун гьан банна,

Барз шинан хIисав банна,

Ина ачай ххуллурдай

Хьхьунил къарал буванна.

Банавша тIутIал арив

Иттай бавцIу лелуххий,

Буси вила дакIнийсса,

Ттулгу дакI цалий дацIан.

Ттула бияла буну

Вин бакъа къахьувияв,

Нитти -буттахь миннат бан

Гьан ба мугьи мугьисалт.

Хъирив кьини кьунниялай къабучIавив шанмайва мугьисалт жуннийн.

Гай циван бувкIссарив ттухьва ниттил бувсукун, на шаппату хьхьичIа бувкьссияв.

Шанмайвагу бивкIун бия цалама оьрчIаяту цIарду дуллай, ттун ххирама оьрчI цаламари тIий.

ХьхьичIарагу гайннал ттул цIа кIицI лагайсса диркIун дия ниттихь.

Мунияту ххари хъанахъисса ниттил гай махъунмай буллай къадиркIун дия.

Буттаннив муния хавар бакъар.

Ттул хIакъиравусса аваза багьан аьркинни буттайн.

Аьмал кIюласса, сситтучIа ссавур къадайсса бутталгу ниттихь цIувххуну бия:

-Вин бавссарив, кIулссарив му хавар, -куну.

Нигьа дурсъсса ниттилгу -къукI -мукI.

«Гьала, ттул душ, ккурчIагу, щаргу ттуй хъяхъи дурну, ири -иривнай ябацIлайрив бивкIсса?!

На мунил му ссурссу кIикIиссурах дукканнахха, чуври му?!

На ххал банна. ..

Мукунсса кучлун ттул къатлуву кIану бакъассар!

Душгу ина, инагу душ!

Дукку, му архIал бакъа ттул къушлийн кIура мадаяра!

Даярча, шаннагу цIа рутанна.

БакI ччанналун дутанна!»

Ласнал жиндралсса хасият душиву кIулсса ниттил, чIун ларгукун ганал сси лялиянхьуви тIий, хьхьичIа букьан бан, на биян бувнав зул шяраву яхъанахъисса цила буттауссичIан, ласнахь ссихI дуккан цахьвагу ачу учин.

Гания махъ ливчIссара на шиккува.

Цала арснан щарну бувцунав.

Амма цаппара гьантравун, нагу кьабивтун, гьалмагъай хIалтIилухун лавгуна.

Ххишала ганая хава -тIавар къабавссар.

Нагу, зун чIалачIисса куццуй, укун лирчIунна.

Щар хьуну лахъи къалавгун ливтIуна нину -ппугу. ..

Бавал цила хавар къуртал бувна.

Циняв кьибивкIун, пикрирдавун лавгун бия.

ЦIан лакьлан диркIукун гай къачча -къаччайнма гьаз шайва, бархIру тIайла бацIан байва.

ИчIуннай кIура дарукун, тавлуву бюруврал къавтIигу бивчуну, малланал цинма буллусса кьурандалул лугу буклай, шанул дугьланнин бава шаний щядикIайва.

Ца хьхьуну, ххюнчIучIрай цинна паллу дичлайгу диркIун, сагъ -саламатну уттудирхьусса Вихьулла -Бава хъирив кьини кIюрххилнин башттан хьуну ляркъуна.