ФОЛЬКЛОР

ЛАККУ МАГЬРИ

КЪАЛАЙЧИНАЛ АРС

ИвкIун ур, къаивкIун ур хьхьичIазаманнай, Чининнал чулуха Румуллал чулухуннай сунттул яннарду дахлай, муси -чинилул тIахIни дахлай чарванну занази заманнай, увкумунил хъирив дакI занази заманнай, ниттин ккавккун, душнил эшкьи дай заманнай, аькьлу -аьдлулул кьимат лавайсса заманнай Гъази -Гъумучиял шагьрулий ЦIувадиял махIлалий ивкIун ур цIа дурксса АьвдурахIман тIисса муххал даву дайсса къалайчи.

Га къалайчиналгу ивкIун ур ца акъа акъасса арс.

Ганан цIагу диркIун дур Аскандар.

ЦачIава дуссукъатлуву цанма кумаг буллалисса арснан, Аскандардун, гьарца кьини буттал булайсса бивкIун бур шанма шагьи.

Гай арцух ци -дунугу нацIу -кьацIу къаларсун, га Аскандардул так луттирду ласайсса бивкIун бур.

Гъази -Гъумучиял цайми оьрчIал нахIу -нацIусса шинни -пинни ласайни, Аскандардул луттирду лавсун, гай ккалай щяикIайсса ивкIун ур шава, кьатIувай тIуркIу тIун къалавгун.

Ганал лавсъсса луттирдал ца къатта буцIавай бивкIун бур.

Укун шинну ларгун дур, къалайчинал арсгу хъуна хьуну ур, ганая исвагьисса чурхгу, бакIгу бусса жагьил хьуну ур.

Ганая дурккусса инсан хьуну ур, исвагьиврущал га аькьлулул щаращигу хьуну ур, шагьрулул душварал итталун агьну ур, ганал хъирив гай занан бивкIун бур.

Ва багьана, та савав дурну, душру дуссакъатлувун бучIайсса бивкIун бур.

Амма Аскандардул гайннух муксса къулагъас къадайсса диркIун дур.

Цал Гъази -Гъумучиял шагьрулувух аваза бувккун бур, Щамахлив паччахIнал душ хъинну бакIрал ххуйсса душ бусса бур, амма га зума къабахълай бусса бур, маз хъама бивтун тIий.

Цуманал га зума бахъан буврив, ганан га душгу щар булунна, дачIи хIукуматгу пишкаш данна тIий усса ур паччахI тIий.

Агар зума бахъан бан къабюхъарча, га жагьилнал бакI кьукьайсса дур тIий.

Аскандардун пикри хьуну бур га душ ккаккан ва га зума бахъан бан.

Буттахь бувсукун му пикри, ппу миннат буллан ивкIун ур ганахь:

-Ургу, арс, жува тIийкун, ттуккуксса барцIгу къабикIайссар, увкуссаксса махъгу къабикIайссар.

Вин ссан аьркинни ми лайсал хаварду?

Жула Гъази -Гъумук, жула Лаккуй бур хъинну исвагьисса, бакIрал ххуйсса хIурулъэн душру.

На вин ччимур душ буцинна, нину -ппу, цуппа душ рязи хьун банна.

Манарда Щамахлив, хъунмасса миннатри.

Ца акъа акъасса ттула арс бат хьуну ччай бакъар, бакI кьуркьуну.

Арснал буттал тIутIимуних вичIи къадирхьуну дур.

Гьунттихавай аьрххилий авчуну ур Аскандар, я ивчIан, я уккан тIий.

Буттащагу шава ацIан къавхьуну бур, гагу арснал хъирив авчуну ур.

Арс най, най, ца нюжмардувун, ахиргу, ивну ур га паччахIгу, душгу бусса шагьрулийн.

ХьхьичIра -хьхьичI хьунадаркьусса нузайн кьутI куну, увххун ур къатлувун.

Гиву ца къари ляркъуну дур.

-Дирзрав, ттул нину!

Хъамаличу кьамул аннав?

-куну, цIувххуну бур.

-Ивзрав инагу, виричуй!

Хъамаличу акъасса кьини ттун къаккакканнав, ттул арс, ачу, щяикIу!

-куну, къарил га кьамул увну ур.

Яла къарил цIувххуну бур:

-Бусила, инава цу уссарав, чатуссарав, архсса кIанава жучIан циван увкIссарав?

-куну.

Аскандардул бувсун бур цува цIа дурксса Гъази -Гъумучиял шагьрулиясса лаккучу, цIа дурксса къалайчинал арс ушиву.

ПаччахIнал бакIрал ххуйсса душнил хавар бавну, я бакI кьуркьуну ивчIан, ягу, душ гъалгъа тIутIи бувну, га буцин тIий, ххуллийн увксса инсан ура цув куну.

Ва хавар буслай унува, ялун ппугу ивну ур.

-Ттул хъунмасса миннатри вихь, ттул арс, ачу, зана хьу шавай.

Вин аьркинмур гьарца зат дуссар шарда.

Вин къахьунсса душ бакъассар Гъумучиял шагьрулий.

Ачу ттущал шавай, -тIун ивкIун ур цIунилгу ппу.

Агь, вил къаттай, мютIий шайсса оьрчI икIайссияв.

Буттахгу вичIи дирхьуну, уттуивхьуну ур, гьунттий кIюрххила ччяни ивзун, исвагьи душничIан гьаншиврул.

Арс уттуивхьуну, шанан ивкIун ур, ппурив, чIаравгу щяивкIун, миннатру буллай ивкIун ур, ачу ттущал шавай тIий.

КIюрххила ччяни бивзун бур гай, кIюрххилссагу дуркуну, къаричIатугу бувккун, ххуллийн багьну бур.

Ххуллийх наниссаксса хIаллай, ппу ялагу миннатру буллай ивкIун ур арснахь, зана икIу тIий.

Ахирданийгу бивну бур паччахIнал чIалъаьрдачIан.

Цавай къатри, цавай чIиртту бур тIар къатрал, инсаннал я батIин къашайсса.

Къатрал лагма къалалул бару, аьралуннал ябуллалисса.

Къалалул ца чулух инсантурал кьуркьусса бакIурдил къала -бакIу.

ХIаятрив -агьалинал ккуччу тIий дуцIин дурну.

Жагьилнан ччан бивкIун бур, тIайлана чурттурдайх лавхъун, уххан душничIан, амма халкьуннал га ацIан увну ур махъа увгьуну:

«Жугуру душничIан буххан ччисса.

Инагу ярглий ацIу!» -куну бур.

ОьрчIан багьну бур яржа бияннин ацIан.

Гай ца -цаних душничIан буххайсса бивкIун бур.

КIива, бакIгу кьувкьуну, бакI барулул ца чулухун, чурх гамур чулухун бутайсса бивкIун бур.

Бивну бур яржа кIивун уххан къалайчинал арснайнгу.

Дахьа чурттурдай ша бизавривун, ппу, агьну ганал хьхьичIунгу, ялагу миннат буллан ивкIун ур:

-Вийн яржа бияннин кIивун бухлай бия, кIива бакIру дакъа буклай бур.

Ца акъа акъасса ттула арснал бакI личин дурну къачча ттун.

Хъунмасса миннатри, ттул арс, манарда, занаикIу, -тIий.

-Утти шиккун ивукун, ттул ппу, занаикIаву -му яла кьадарсса даву хьун най дур.

На ухханна кIивун.

Агар бюхъарча, душ гъалгъа тIутIи банна, къабюхъарча, вайми жагьилтурал кунна, ттул бакIгу гай бакIурдил бакIуй дикIувча.

Ппугу хIурматрай хьхьичIа гьаз увну, Аскандар чурттурдайх лавхъун ур.

КIий, къатлул хьулух, турдугу хъачIунттай дирхьуну, кIия нукар бавцIуну бур тIар.

Увххун ур къатлувун.

Гиву, арулла пардавгу хьхьичIух дархIуну, душ щябивкIун бур тIар.

-Бургу, душ, вичIи диша ттух, -увкуну бур оьрчIал.

-На хIакьину увкIра вихь ттула суалданун жаваб дула учин.

Ххал банна, вил ци гьунар бурив.

ВичIи диша ттул хаварданух.

Цал мукьа гьалмахчу аьрххилий ххуллийн бувккун бур.

Гай най, най, ахирданийгу бивну бур ца хъинну ццунсса, лахъсса мурхьру бусса вацIлучIан.

Гайннан вацIлуву гьантта бикIан багьну бур.

ВацIлувусса жанавартрая буруччиншиврул гайннал икьрал дурну дур къавтIи бичин ва шан -шанна ссятрай ярглий ца -цаних тIий гьарцаннал къаралгу бан.

Шама утту ивхьуну ур, ца къаралданий авцIуну ур.

Гъалгъа бансса, ихтилат бансса цучIав акъа, га къаралчи бизар хъанай ивкIун ур.

Ганал га ца мурхьирая кьувкьусса бутIуя исвагьисса щарссанил гьайкал дурну дур.

Укун ларгун дур шанна ссят.

Изан увну ур шанашисса га ца гьалмахчу къарал бан, цуварив тIурча, уттуивхьуну, шанан ивкIун ур.

Къарал бан ивзма лагма -ялтту урувгун ур.

Ххал хьуну дур кIачIа -кIулусса щарсса.

«ВахI, шиккун кIачIа -кIулусса щарсса чату дуркIссар?» -куну цахьва цалагу, ганичIан гъан хьуну ур.

Ургарча, га щарсса тIаннуя дурсса щарсса ляркъуну дур.

-Агьа, -куну бур ганал, -ттуяр хьхьичI къарал буллалима тIаннул усттар ивкIун ур.

Ганан цала гьунар ккаккан бан ччай бивкIун бур, ва щарсса тIаннуя дурну дур.

Нарив дарзи ура.

Нагу ванин янна дуванна куну, янна дурухлан ивкIун ур.

Га яла ххуймур янналия га щарссанин янна дурурххуну дур, бакIрая ччаннайн дияннин.

Ларгун дур, укун зий уна, шанна ссят.

Изан увну ур хъирив къарал банма гьалмахчу.

Цувагу шанан уттуивхьуну ур.

Шихунай, тихунай занай уна, къаралчинан ккарккун дур хъаннил гьайбат дусса, ххуйну яннагу лархсса, амма тIаннуя дурсса щарсса.

Ганал куну бур:

-Агьа -гьей!

Цалчинма къаралчи тIаннул усттар ухьунссия, кIилчинма къаралчи дарзи ухьунссия.

Нарив мусил усттар ура.

Нагу ванин чIюлушиндаран мусил затру дуванна.

Улувкьуну ур, къушгу тIивтIуну, кIисри, вичIилусру, канишру, яхарду, щинзирду дуллай.

Гьарца зат хIадурсса ганал гай бигьану ччяни дурну дур.

Дирчуну гайгу, чIюлу дурну дур га щарсса ца ссятрал мутталий.

Яла изан увну ур мукьулчинма гьалмахчу къарал бан, цувагу шанан уттуивхьуну ур.

Мукьулчинма къаралчинан хIисав хьуну дур щарссанил къаралти.

Гъан хьуну ур -тIаннуя дурсса чIюлусса яннардавусса, мусил чIюлушиннардугу дусса щарсса.

-Ттул хIисаврай, -куну бур ганал, -цалчинма къаралчи тIаннул усттар ивкIун ур, кIилчинма дарзи ивкIун ур, шамилчинма тIурча мусил усттар ивкIун ур.

Яла ганал, каругу гьаз дурну, ссавруннайнгу уруглай, куну бур:

-Аман, Аллагь, хъуннасса кьудратрал заллу, дунияллийсса циняр рухI дур кусса затру ляхъан дурма!

Утти на вай ттула гьалмахтурачIа кьюкьин маитара, на начливун агьанмур мабара, ттул хъунмасса миннатри, ва щарсса сагъ дува вила кашилийну!

-куну.

Аллагьнан бавну бур ганал миннат ва га душ сагъ бувну бур.

Ганищал гъалгъа тIий, хъяй, вамур -тамур буслай уна, чантI куну бур ганал гьалмахтал, яла бяслихун багьну бур, ва ттулли, вил бакъар тIий.

-На ва тIаннуя бав, ва ттун бикIан аьркинссар!

-куну бур цалчинманал.

-На ва лаххан бав, ванин янна дав, ттун бикIан аьркинссар!

-куну бур кIилчинма гьалмахчунал.

-Зу ци тIий буру, кьабагьи.

На ва чIюлу бав, арцу -мусил чIюлушиннарду дурну.

Ва ттун багьайссар, -куну бур шамилчинма гьалмахчунал.

-Кьабагьи, кьабагьи!

Зу хIазранну бясру буллалисса.

На ва душ сагъ къабувссания, ва тIаннуя дурсса хъамитайпалул гьайкалъя, на ва сагъ бав!

Мунихлуну ва щиннияргу ттун багьайссар!

-куну бур мукьулчинма гьалмахчунал.

-БакIрал ххуй исвагьий!

-куну бур Аскандардул паччахIнал душнихь.

-Га душ щин багьайссарив буси ина.

Душнил жуав къадуллуну дур.

-Ина чарийн буккивуй!

-куну бур оьрчIал.

-Нарив тIий ура, душ хьхьичIа -хьхьичI бувсса тIаннул усттарнан багьан аьркинссар тIий.

-Инава укку чарийн!

-куну бур исвагьи душнил.

-Га душ тIаннул усттарнан циванни багьайсса, га сагъ бувсса мукьулчинма гьалмахчунан къабагьну?

Душнил гукун учавривун, зяв -зяв тIисса лахъсса чIурдугу бувну, кIира пардав душнил хьхьичIа бат хьуну дур.

Увккун ур арс буттачIан сагъну -саламатну.

Бавчуну бур цивппа гьантта бивкIсса къаричIан.

Ххуллийх ппу ялагу ахчуну ур арснахун:

-Гьари, арс, ина душнища жуав ласун бюхъаву.

Ачу уттивагу сагъну уна шавай, -тIий.

Арснал буттал тIимуних ургъил къабувну бур.

Гьунттихавайгу, кIюрххила бивзун, лавгун бур паччахIнал къалалучIан.

Ххуллийх ппу ялагу миннат буллай ивкIун ур, зана хьу шавай тIий.

Амма арс ганал тIимуних вичIилий къаивкIун ур.

ХIакьину ганахь ярглий ацIу чайсса цукIуй къаивкIун ур.

ТIайлана увххун ур душнил къатлувун, кIия ганил хьулухсса къаралчигу тий -шийнай увну.

Душнил хьхьичI утти ххюра пардав диркIун дур.

-Душ, ина лахьхьу жуав дуллуна.

Бачу, ххал банну хIакьину виву ци гьунар бурив.

Ттух ххуйну вичIи диша.

Ина ци жуав дулайрив ххал банна.

Цал мукьа ишбажаранчи цала дахху -ласулул иширттай ххуллийн увккун ур.

Шагьрулул къапу лакьиннин биянну тIий, гай анаварну най бивкIун бур.

Агь, вил къаттай!

ЧIал хьуну бур.

Гайннан багьну бур чIаравсса шяравусса чарвансарайлуву гьантта бикIан.

Гиву гай, микIитIанханалуву за канай бунува, бувххун бур ца хъинну бакIрал ххуйсса душ.

Гай мукьуннанмагу га ххуй бивзун бур, ганих ччаву хьуну дур.

Га душнил цIаний гай бяслихун багьну бур.

-Ва ци аьлагъужар, ци къалмакъалли?

-тIий, гивун дурххун дур дукра дукай къатлул заллу -щарсса.

-Зу зула къалмакъаллу ттучIа къадуллай, кьатIув, зува нанисса ххуллий дувара!

-Валлагьий, жун мукьуннанмагу ххуй бивзунни ва душ, жул бяс ванил цIанийри.

-Агьа -гьай, иш мукун бакъар.

На ва ттула душ булунна зуяту цания цаннан, цуманаща бювхъурив ххуйсса пишкаш дан.

Гай чани хьуннин шанан къабивкIун бур, га душнин яла ххуйсса ци ласун хъиннивав тIий, пикрирду буллай.

Чани шайхту, анавархъиндарай гай шагьрулувун левчуну бур, базар бусса кIанайн.

Луглан бивкIун бур базаллувух душнин ласунсса затрах.

Амма мукунсса, я бацIансса цичIар чIалай къадиркIун дур.

Ахирданийгу, бурувгун бур -ца кIанттайн ккучун дурну халкь бавтIун.

Гъан хьуну бур гайнначIан.

Бурувгун бур -ца чIивисса халича бахлай.

-Ва ци халичар?

-куну бур.

-Ссанни ва?

-Ванил багьа азарда къурушри!

-куну бур тайннал.

-Азарда къурушрах укунсса ттуршва халича ласун бюхъанссархха, -куну бур ишбажаранчитурал.

-Юх, укунсса халича кьювкьусса багьлун къабаххайссар.

Ва леххай халичар.

Ваний щяикIу -ччимур билаятрайн янил ляпI учиннин иян айссар инсан.

-Ванияр ххуйсса пишкаш ттуща лякъин къахьунссар!

-куну, га цаннал лавсуну бур халича.

Гайми луглан бивкIун бур пишкашрах.

Ххал хьуну бур агьали ккучун дурну бавтIун.

Гъан хьуну бур гайнначIан.

Бурувгун бур -дахлай чIирисса дагьани.

Багьа цIувххуну бур.

-Азарда къурушран, -куну бур.

-Азарда къурушрах укунсса дагьани ттуршра ххишалагу ласун бюхъанссархха, -куну бур.

-Ва ци дагьанир азаруннинсса?

-Агар ина ванивун ургарча, вин щала дуниял, хъанахъисса ишру ккакканниссар, -куну бур.

-Ттуща ванияр ххуйсса пишкаш лякъин къахьунссар, -куну, га ца ишбажаранчинал ларсун дур дагьани.

Гайми кIиягу ишбажаранчи луглан бивкIун бур хъунмасса базаллуву душнин дулунсса пишкашрах.

Гай гъан хьуну бур чансса халкь лагма лавгсса ккучундалучIан.

Бурувгун бур -битIякIиссаксса шуша дахлай.

-Вагу цири тти?

Ссан дахлай бур?

-куну, цIувххуну бур.

-Ванил багьа азарда къурушри, -куну бур.

-Яр, азарда къурушрах ваксса азарда шуша ласун бюхъанссархха, -куну бур ишбажаранчитурал.

-Юх, азарда укунсса шуша лякъингу къабюхъантIиссар, ласунгу къабюхъантIиссар.

Ва шушлува ца кIунтI бутIирча, ивкIусса инсан сагъ уккайссар, -куну бур.

-Мяйжанссар, ванияр ххуйсса пишкаш ттуща лякъин къахьунссар, -куну, шамилчинма ишбажарачинал ларсуну дур шуша.

ЛивчIсса мукьилчинма ишбажаранчигу туну, луглан ивкIун ур душнин дулунсса затрах.

Гъан хьуну ур халкь бавтIсса ца кIанттайн.

Урувгун ур -кIива битайсса мажар бахлай.

-Ссан бахлай ура?

-куну бур баххухь.

-Азарда къурушран, -куну, жаваб дуллуну дур.

-Яр, азарда къурушрах укунсса мажарду ххюва -ряхва ласун бюхъанссархха, азардагу чунни ваних?

-куну бур ишбажаранчинал.

-Ванил личIишиву цири?

-Агар архIал кIивагу вярттувух битарча, кIира хIукумат бат дан бюхъайссар архIал, -куну бур.

-Ванияр хъинсса пишкаш ттухьхьун къадириянссар, -куну, лавсун бур кIива битай мажар.

Гай мукьагу ишбажаранчи архIал зана хьуну ур га микIитIанханалувун душнил ниттичIан.

Бурувгун бур -душ бакъа.

Ниттил бувсун бур:

«Зу бакъа буна, ца билаятрайсса паччахIнал нукартал бувххун шивун, хъап куну, душгу бавцуну лавгунни, душгу, нагу вев -шев тIутIи бувну.

Ттуща щинчIав оьвчин къавхьунни, кумаг бара чин.

На дардирдал хIалдания ларгун, дагьну диркIун дура.

-Анаварну дагьани дукки, ххал ба душ чув бурив, -куну бур дагьани ларсъсса ишбажаранчинахь гайминнал.

Бурувгун бур дагьанттувун.

Душ ккавккун бур ца паччахIнал къалалуву, тахлийнгу багьну, бивкIуну.

Ганил лагмагу лавгун хIакинтал, вазиртал, паччахI.

-Анаварну вила халича буккан ба, -куну бур халича лавсманахь.

ЩябивкIун бур халичалий мукьагу.

Га цIана га паччахIнал къатлуву хьуну бур.

Шуша дусса ишбажаранчи гъан хьуну душничIан, ганил кьацIливун кIунтI бувтIуну бур.

Душ, яругу ссуку буллай, сагъ хьуну, шания бивзун бур.

Га буцин кьаст лархIукун, паччахI гайннал хьхьичIун увккун, куну бур:

-На мунихлу мунил ниттин щаллусса дарваг мусил, ашрапирттал булав.

Мунихлуну душ буцлан зухь ихтияр дакъассар.

На амру банна ттула аьралуннайн, зу бугьияра куну.

Микку мукьулчинма ишбажаранчинал бурган бувну бур цала мажар паччахIнайн ва куну бур:

-Ва, кIивагу вярттувух архIал битарча, кIира хIукумат ппив дайсса мажарди.

Инавагу сагъну ливчIун, вила агьлу -авладгу яхьуну, вила хIукуматгу сагъну ччай духьурча, гьарза къабуллай, паракьатну жу гьан бити, -куну.

ПаччахIнан бавну бивкIун бур, мукунсса мажар бусса бур тIий.

Мунихлуну, гай мукьагу аьжаивсса ссихIирданул инсантал бусса ххай, итабакьин рязи хьуну ур, мийн -тийн бакъа.

ЩябивкIун бур ххюягу инсан халичалий, левххун, гассят шаппа хьуну бур.

Шаппай чарвансарайлувун бивукун, нину махIаттал хьуну дур, вай ци гьунарданул инсанталли, паччахIнаща цила душ зеххин бювхъусса тIий.

Аман, душнил цума адимина цила ласну личIий айвав, цуманаща бюхъайвав душ, паччахIначIа кунма, ххуйну ябан?

-тIий, пикрирдавун дагьну дур.

Мукьагу ишбажаранчинал дяниву бяс багьну бур:

«Душ ттулли, душ ттулли!» -тIий.

Халичалул залуннал куну бур:

-Душ ттул бикIан аьркинссар, цанчирча на зу, тихунгу биян бав, шихунгу буцав.

-Душ ттул хьун аьркинссар, -куну бур дагьанттул залуннал.

-Цанчирча на ккаккан бав душ щил бавцуссарив, щичIа буссарив.

На лякъав га.

-Зу къатIайлассару, на акъассания, зу душгу бакъа личIантIиссияв.

БивкIусса га на сагъ бав.

Мунихлуну душ ттун багьайссар!

-куну бур инсан сагъ айсса чIири шушлул залуннал.

-Зу цаягу къатIайлару.

Душ ттун багьайссар.

На акъассания, паччахIнал, бувгьуну, зугу, нагу аьс бантIиссияв.

ПаччахI ттул мажардания нигьа увсун, жува итабавкьунну.

-Ия, паччахIнал исвагьи душ, -куну бур Аскандардул, -гай мукьагу ишбажаранчинан цуманан бикIан аьркинссар душ?

Жуав къадуллуну дур душнил.

-Ина някI чарийн буккивуй!

Ттул пикрилий, душ халичалул залуннан бикIан аьркинни!

-куну бур къалайчинал арснал.

-Инава някI чарийн укку!

-куну бур паччахIнал душнил.

-Циванни душ халичалул залуннан бикIан аьркинсса, га бивкIусса душ сагъ бувсса шушлул заллу сагъну уна?

Га цIана занглил чIу хьуну бур, душнил хьхьичIсса кIира пардав ялагу тиннай -шиннай хьуну дур.

Жагьил хIаятравун увккун ур.

ХIаятраву цала ппу лявкъуну ур чIири хьуну.

Лавгун бур гай чIири бичучIан.

Бивчуну бур буттал чIири.

Лавгун бур къаричIан.

Утти ппу ххарину ивкIун ур, арснаща паччахIнал душ кIийлва зума бахъан бан бювхъунни тIий.

Утти арснал бакIгу къакьукьинтIиссар тIий.

Утти бигьану ссихI ласун бюхълай ивкIун ур ппу.

Дуркуну дукрагу, уттубивхьуну бур шанан.

Ххуйну шанугу лавхъун, гай кIюрххила бивзун, лавгун бур паччахIнал чIалъаьрдавун.

Ганахь ярглий ацIу тIисса цучIав къавхьуну ур.

ОьрчI лавхъун ур ялагу чурттурдайх кIийн.

Къаралчитурал ссихI къадурккун, га уххан ивтун ур душничIан.

ОьрчIал душнихь куну бур:

-Ина, ххуй душ, ттухьхьун кIийлла жаваб дуллунни.

Уттигу ххал банна вил ци гьунар бурив.

Ттух ххуйну вичIи диша.

Урганна, ина ци жуав дулайрив.

БивкIун бур, къабивкIун бур ца билаятрай вазирнал арсгу, паччахIнал душгу бивкIун бур.

Гай кувннан кув хъинну ччай бивкIун бур.

Амма паччахIнан ччай бивкIун бур цала душ цама паччахIнал арснан булун.

Вазирнал арснан булун ччай къаивкIун ур.

Душнингу, оьрчIангу, ци хьурчагу, цачIун хьунсса кьянкьасса пикри бивкIун бур.