МАГЬИРЛУГЪ

ЧИВЧУССА ЧАНИ

Ца ххуллух, муниннин кIива -шанма гьантлул хьхьичIва хIадур хъанайгу бивкIун, Камил Чутуевгу архIалну, хъунмасса ххуллугу бивтун, лавгссияв лакрал ухссавнил дазуйсса кIира шяраваллил сурат рищун (тарихрая чичлай, аьркин дагьлай дуну )-ЧIаящиял ва Муккурдал шяраваллил.

Лавгун, кIирагу шяравунгу бивну, гьарцанний цинма -цинма лайкьсса тамашагу бувну, зана хьуну бувкIссияв махъунмай -цурда ца суратгу къарирщунма.

Валлагь, тIайлассар, къарирщуна Камиллул царагу сурат.

Къарирщуна, Аллагьнал ссавнияту бивтсса баргъ цан ччисса куццуй бивтун бакъар тIий.

-Да, рищаярчу, ина ци тIиссара!

Бургъищал ччалаччисса инсан икIайссарив?!

-тIий, вев -гьарай тIий бивкIру жу -тай шяраваллавун Камиллущал архIал ялагу та гьан хьувив къакIулсса нагу, ттул гьалмахталгу.

Ай, юх!

Рищун ан шайсса Камил икIайссарив.

БувкIссияв лавгсса куццуй махъунмай.

Мугу мурив, ттигъанну ца цама ттула гьалмахчуналгу бувсунни, сурат рищунну тIий, Камиллущал кIа жула Лакку билаятрайсса яла бюхттулмур зунттуйн -Щунуйнгу лавхъун, мукунма, царагу суратгу къарирщунма, махъунмай бувкIру куну.

Ча, Аминнул арс ЧчютIухъал Камил хъинну хъунасса, ххишала акъа гьунар ххисса фотограф ушиву тасттикь бан ччисса хIуччалучIан бувцусса мисалли ва мисал.

Цалла язи дургьусса сянатраву профессионал акъасса инсаннаща къашайссар, лахъан усса Щуну -Зунттул кIиллувунгу лавхъун, цанна ччисса, кьамулсса куццуй дагьан къананисса суратгу къарирщунура риртун, махъунай учIан.

Камил Чутуевлул янила ва канила дурксса фотосурат, цайминнан къакIулли, ттун ттунна дурчIай найдунура тихара, манзилданий.

Кказитрай ягу журналданий рирщусса суратрал лувсса чичрулух урувагу -къаурувгна, увчIай заллу цу уссарив.

Ва фотограф авторсса гьарца суратрал вивх чара бакъа бикIай экьилавгун ляличIисса чани, чаннал зурзу.

Га чаннал хъунмур биялагу чассарив найбуна исватну лаласун къахъанан бикIай -ссавнияту бивтсса бургъияссарив ягу цала фотографнал дакIнивассарив.

ХIасибул калам, ми кIивагу чани цаннияр ца хIикматну хIала бувххун хIасул хьусса куннасса дикIай Камиллул жунна кьадрулий пишкаш дайсса суратру.

Цуппа «фотография» тIисса мукъул мархлул мяънагу грек мазрая «чани чичлай ура» тIисса душиву хIисавравун лавсукун, ляличIинура магьирну ва махIатталну му мяъна даркьунугу дур Камиллул янил ва канил хатIлицIун.

Ванал цумурцагу сурат ттунна чIалан дикIай чивчусса чанину.

Яллагь, янувну чаннасса лякъиннав вил кьадарданий чивчумургу, чаннану зияратсса хьуннав ина вания тиннай рищунтIими, чичинтIими суратругу.

Ттигу цимирагу дакI ххарисса сурат чичинсса цIуллушивугу, кьудратгу дулуннав, жул дус ва уртакь, Камил, вихьхьун!

Руслан Башаев