ПОЭЗИЯ
Миясат Щурпаева
***
Нажмуттиннул душ Щурпахъал Миясат бугу -бувну, хъунмагу хьуну бур Гъази -Гъумучиял шагьрулий, Гъумук махъ нанисса ва цIа дусса кулпатрал ва тухумрал дянив.
Ттинин цилва бивтсса оьрмулул дурусну бачIи Миясатлул харж бувну бур педагогнал даврил, дуклаки оьрчIахь ва душварахь литературалул ва оьрус мазрал дарс дихьлай.
Хъинну чIавану бунава, Гъумук чIун архIал душваращал тIуркIу тIинийва, байбивхьуну бивкIун бур Миясат назмурду чичлай.
Ванил цалчинсса назму рирщуну дур «Ххяхха баргъ» кказитрай, 8 классраву дуклакисса чIумала.
Амма яла махъ, цуппа гьунар бусса шаэр бушиву исватну бувну мукьах, ванил хъинну хъунмасса хIал бувну бур кьабивкIун, цукуннив хIалаватну литературалувух бакъа.
КъакIулли хъунмур ва мяйжанмур багьана ссаву бивкIссарив, (бюхъай му мукун бан багьлай бивкIунгу бикIан ), амма махъсса шиннардий, учиннуча, ца ацIра -кьура шинал мутталий, Щурпахъал Миясатлул жулла лакрал литературалуву дурсса давурттах, чивчусса асардах урувгукун, ххарил махIатталгу хьуну, ванил чикъачлай лях итадаркьуну диркIми шиннардий так хIайп учинсса бакъа личIлай бакъар.
Ванил язи -язими назмурдаву бур царагу чIумуща лиххан бан къахьунсса ххару, бакIравату чивчусса бакъача, дакIнивату ливчусса, -аьзаврай ва тирххандарай яхъанахъисса дакIнивату.
Буккияра ванил шеърирду, ххал бара цал уттигу -бюхъайссар чIявуссаннал дакIурдин маччасса ва малхIансса лякъин.