Махсаралул мурцIу
ККАВКЧУ -КIУЛЧУНАЛ АЯТ
Пикри мабари, цимурца ххуйну хьунтIиссар.
ДучIантIиссар жучIанна жура хьурдайрагу чин сикъасласисса кьинирду -цимурца тIутIайх дирчусса, ххаришиврул ва буллугъшиврул къявхъа тIутIисса.
Гьай -гьай, ттинин къахъанай бивкIхьурчагу, циняв жула масъаларттугу щаллу хьунтIиссар.
Гьунттийва бакьин бантIиссар школартту, къашавайми, мушакъатми дузал бантIиссар дарурттал.
ЦIупI бивкIун занантIиссар жула оьрчIру.
Яла -яла, жунма бавссар, ттигу баянтIиссар, миксса бювчIу махъру -ичIаллил дан -дитанмунилсса жунма буллан аьркин бакъассар.
Миннул пикри бансса пикри жувунма бухханнин дурну лякъин бюхъайссар.
Ччав вилах цIудуккан дан, ччав ишбажаранчишиврул даву дачин дан, гьай -гьай, маэшат гьаз баншиврул -пикри мабара, ласи кредит!
Бугьараминнангу, ветерантурангу дагьантIиссар цидунугу.
Учиннуча, пенсияртту ххибаву, ЖКХ -лул къуллугъирттахсса багьри ялавай баву.
«ЖКХ» тIисса ци тIиссар учав?
«Живи как хочешь» -тIиссар.
Вай цимурца жунна хьунтIиссар вай гьунттий -сарасса бувчIавурттай.
Райондалул бакIчинал, халкьуннал мажлисрал, шяраваллил бакIчинал къуллугърал цIаний цукун талан аьркинссарив кIуллив вин?
Огьо -гьо!
Цимурца лирккун, бакъача, цимурцаннуцIа хьуннин!
Пикри мабара, ми цимурца махъуннай дучIайссар.
Амма хьурдай тIисса кIанттуйнсса мандат къдириярчарив, му аьщун изаврин ккалли бан аьркинссар.
Асттавпируллагь!
Асттавпируллагь!
Мандат кIунттил дургьукуннив, вил кIунттихь дуссар цимурца!
Куклушиннарду, ихтиярду!
Огьо -гьо!
Вин бюхъанссар чIурду буллуми хъама битан.
Му шайсса затрича, пикри мабара.
ЦIана ми къуллугъирттайнсса кандидатътал гьарча чIирая, ххуллийсса ттурцIая, ттучаннал чIавахьулттая зух буруглай буссар, хIайран буллалисса, жуйн вихшала дишара тIисса пишлищал.
Гьарма тасттикь буллантIиссар так цува лайкьшиву вихшалдаран, так цащава бюхъайшиву цимурца дан.
Ина мукIру антIиссара чаннасса бучIантIимур цала биялдаралу бушиврийн.
Гьаманки, муна му бувчIавурттал хьхьичIсса гьавур -завурдануву бюхъайссар цавайннал духхингу -къатта, машина ласун, къуллугърай щяикIан.
Цамур бакъахьурчагу, уччиннин хIан хIачIан.
ХъачIрайн энгу дахчин дурну, хъаралу чIуен бувсса киса -чантайлува арцу дачIлай заназисса пиш -кьишлищалсса хъамитайпардугу хьунабакьинтIиссар.
Шярайхуккул кунна, минначIан ка матIитIара, миннал вичIанни тIитIинтIисса, арцугу кIучI дуллай.
ХIайп мачара, чIурду ласлай,
Экьи дирчусса арцуй!
ХIайп уча, арцурду дачIлай,
БагьтIатIал хьусса ччаннай.
Огьо -гьо!
Избирательнал чIу муксса ххира хьунтIиссарха, -ссуг дарчагума, тIааьнну баллан бюхъайссар.
Мандат дирирну махърив бюхъайссар паракьат хьун, хъамабитан буллусса махъругу, буллусса чIурдугу!
Нагу вава Валерий Амиров.