Миясат ЩУРПАЕВА
ГЬУЙННАЛ ХАНИЧА
Яру Муккурив ливчIсса,
Чурх Чаргаснаву ливчIсса,
Пардав цIарал ччурччусса
Гьуйннал хIаллил кIалахIи.
Халкьуннал
Ва иш хьуну бур ХХ ттуршукулул дайдихьулий.
Та заманнай Маччайннал махIлалийгу, Лаккуйгу цIа дусса бусурман диндалул аьлимчу ва ка сававсса, за кIулсса хIакин Муккурдал Оьмари -ХIажинал бивкIун бур ххюя арс ва шанма душ.
Хъуна -хъунамагу ивкIун ур МахIаммад тIима арс.
Цала буттацIа бусурман диндалул элмугу, хIакиншиврул касмугу лархьхьуну, МахIаммад лавгун ур гъансса арамтуращал хIалтIилухун Баталпашинскалийн (Черкесск ). Гихгу зий ивкIун ур цал къалайчину, яла варшав арцуя, кIяла арцуя янна -ярагъ, дучрал сурсат дан лахьлай, гай Чаргаснаву ххуйну харж хъанай духьувкун.
Къушлийн цанна аьркинмур дува учин учIайсса къазахънал атаманнан цала тIул -тIабиаьтрацIун МахIаммад бусрав хьуну, ванащал дусну ивкIун ур.
Цала даврихухгу машхул хьуну, Лаккуйн учIан дакIний бакъасса МахIаммадлуйн бувкIун бур буттал чагъар, арснахь цала ссил хъатIийн учIан аьркиншиву баян буллай.
УвкIун ур МахIаммад Муккурив.
Ца кьини кIюрххил щарнил ккурчIавсса арамтурачIа авцIусса МахIаммадлун ккавккун бур Гьуйннал хъаннищал цала къурувсса ххулу бан нанисса Гьуйннал ЧIиви -МахIаммадал душ Ханича.
Га ванан хьхьичIвагу кIулну бивкIун бур, амма утти, чурхгу бувккун, гьайбатгу дуркIун, Ханича ябацIайсса душ хьуну бивкIун бур.
Гайва гьантрай ХаничачIан ххуллу лявкъуну, МахIаммадлул ганищал ихтилат бувну, га щинчIав цIа рирщуну, кIисса лавххун бакъашиву кIул хьувкун, ххаригу хьуну, бувсун бур ганил чулухунмайсса цала пикри.
Гания мукьах жагь къурув, жагь ххуллий цаннан ца ккаклай, дус хьуну бур.
Цала ссил хъатIийн оьвчин Ханичахъаннийн цува МахIаммадгу лавгун ур.
Амма Ханича буцин ччисса Гьуйннал Хъуна -МахIаммадлун вайннал дя -зума тIааьн къадирзун, мунилшиврий Ханичайн аьнцI -ккиш тIун ивкIун ур.
Ханичал бувчIин бувну бур Хъунаманан (Гьуйннал Хъуна -МахIаммадлуйн кутIану Хъунама учайсса бивкIун бур )цила ганал чулухунмайсса цукунчIавсса пикри бакъашиву ва тачIав къабивкIшиву.
МахIаммадлул ссил хъатIий Ханичал хъинну бюххансса такьвалий авурсса балайрду увкуну, мажлис чIюлу бувну бур.
Гания мукьах цаннан ца ччан хьусса МахIаммад ва Ханича чIа -чIаних хьунабакьлай, ччаврил аваза халкьуннал зума -ккарччулун багьну бур.
Бавну бур му хавар Оьмари -ХIажинангу.
ЦIувххуну бур арснахь гьуйридушнищалсса дя -зумалия, арсналгу бувсун бур та душ цанма буцин ччай ушиву.
Оьмари -ХIажи хъинну шавхьсса, аькьлу бусса адимина ивкIун ур.
Цала щарссанихь, Мисидухь, увкуну бур ганал:
«Жула оьрчIал ялув чил душнияту махъ буккаву къахъинссар, бунагьссар.
Агар душнил нину -ппу рязину бухьурчан, душ буцин куну, цалий бацIан бан аьркинссар», -куну.
Гайва гьантрай, махъ цачIун бувну, буцин куну бур Гьуйннал Ханича МахIаммадлун, ялунчIин хъатIи бан куну икьралгу дурну.
Лавгун ур МахIаммад махъунай Чаргаснавун.
Ханича буцин куну мукьах жиндрал хьусса Хъуна -МахIаммадлул ца кьини, бувгьуну Ханича кIичIираву, гания лачак лирккун, лавгун ур ккурчIав.
-Вана на Ханича бугьав, тания карши ликкав!
-тIий.
Ханичал аваза гацIана ппив хьуну бур Гьуйннал ва Муккурдал агьалинавун, бавну бур Чаргаснавусса МахIаммадлунгу.
Ца кьини маркIачIанай, халкь шаппа -шаппай лавкьусса чIумал, увкIун ур МахIаммад кьюлтIну Гьуйннал шяравун, лавгун Ханичахъаннийн, цIувххуну бур хьумуния.
Яла оьвкуну Сакилав тIисса адиминайн, ганан ххуйсса багьагу буллуну, икьрал дурну дур, Хъуна -МахIаммадлучIан лавгун, танащал ихтилат бан ччисса Гъумучату увкIсса адимина ур ккурчIав куну, га шавату уккан ан.
Барз бакъасса, хъинну цIансса хьхьу диркIун дур.
МахIаммадлулгу икьрал дурну дур Сакилавлущал, цува Хъунаманащал кIичIиравун увккукун, цума цумарив личIи ан бюхъаншиврул, пIапIрус тIутIу куну.
МахIаммадлучIа диркIун дур гихара хIадур дурну ларсун увкIсса даелсса чIила, танал я вичIи, я май кьукьинсса пикрилий.
КьюлтI хьуну ур МахIаммад гайннал кIичIираву.
Сакилав Хъунаманащал кIичIиравух авчукун, чIиллущал ганайн ххявххун ур.
Амма Хъунаманал гацIана ка гьаз дурну, МахIаммадлул чIила ганал канийнгу щуну, бакIрайгу щаву дурну дур.
Оьттул чап -чап тIисса Хъунама ливхъун ур шавай, МахIаммадгу акъа -къатIа хьуну ур.
Бувккун бур леххаврий Гьуйннал арамтал, луглан бивкIун бур шяравух кIулакъух, яла щак багьну, оьвтIун бивкIун бур Муккурив, гайннал чиваркI циняв шаппах бурив ккаклай.
БакIра -бакIрах гьарцаннайн оьвтIий, Муккурдал арамтал, жагьилтал шаппах лявкъукун, Гьуйннал арамтал кIюрххицIунгу луглан бивкIун бур цала щарнил зума -къирагърайх.
ЦучIав къялявкъуну ур.
Цаппара хIаллава бувкIун бур Гьуйннал арамтурачIан Кисловрая МахIаммадлул чагъар:
«...ЧIила щунахгу малугларди, чIила щумагу нара, му угъраш сагъну кьаитаврия пашманна», -тIий.
Гания мукьах МахIаммадлул ссурвалгу, гъанчувгу утти Ханича МахIаммадлун къабуцайссар тIий бавцIуну бур.
Га шиналгу къаувкIун, кIилчинмур гъинттул шавай увкIсса МахIаммадлун бувчIуну бур цала шаппамигу, гъанчугу Ханича буцин рязину бакъашиву.
Оьмари -ХIажиначIан укIлан ивкIун ур ЧIарттал шяраватусса Нураттин тIисса хъинсса дус, МахIаммадлун цала душ булунсса пикрилий.
Гужрай маз -кьаз бивхьуну тIайла увккуну ур Мисидул арс ЧIарав, душ ккаккан.
ЧIартталгу ванан булун ччисса душ бакIрал ххуйсса бакъахьувкун, МахIаммадлун цамур ххуйсса душ ккаккан бувну бур.
Лавгун бур МахIаммадлул ссурвалгу, гъансса хъамигу ЧIарав Нураттиннул душнийн кIисса лаххан.
Га кьини Гьуйннал шяравусса ца мажлисрай Ханича бивкIун бур балай тIий:
Тирххандаран буккайсса
Ссавруннай ссурулккурттай,
Экьинай бур ттул яру,
Вих мякьну ялугьисса.
Мисрилив ссапар бахIлай,
Чаргаснаву къуш бишлай,
Барзунттай балчан бахIлай,
Арх уцлацисса цанна?
Ва Гьуйннал ратIгу ратIрив,
Ламугу ссиратIраллив,
Зунтту битан айгъурдун
Аьркраххуллугу архрив. ..
Му чIумал мажлисрайн увкIсса Гьуйннал Набинал увкуну бур:
«Учагъарин, Ханичай, балай уча, вил гьалмагъайхъул чIарадушнийн кIисса лаххан лавгуннича», -куну.
ГацIана ччергъилугу экьилирчуну, ливхъун бур Ханича мажлисрая.
Шаппай къабивнува кIичIираву багьну бур, кIулшилия лавгун.
Лавсун хъаннил Ханича шаппай биян бувну бур, амма кIулшилийн бувкIнугу, ганища шания бизан къавхьуну бур.
Гьунттихавай чIарадушнийн кIисса лаххан ларгсса гъансса щарссанил МахIаммадлухь увкуну бур:
-Муккурияту ЧIарав ияннин шанщархъайх ина га яла я къабацIанмур душних луглай уссияв, та ци душъя ина буцлацисса, тания Ханичал лухIи михьирал багьасса бакъая, -куну.
Хъинну махIаттал хьусса МахIаммад лавгун ур ЧIарав, цанма буцин кIисса лавхсса душничIан.
Ххал барчан, ца бивщу бя куннасса лажиндаращалсса, чурххалгу лякъабувксса душ лявкъуну бур.
Цува хъяврин аврийн ссибивзсса МахIаммадлухь Нураттиннул куну бур:
«Ина щарссанил лажиндарава щин хIачIлан най урав, мулкгу, хъусгу чийх къадуккан на ттула ца бакъа -бакъасса душ уссу кунасса дуснал арснаннахха буллалисса», -куну.
Шавай увкIун, МахIаммадлул цала буттахь увкуну бур:
-На та душ буцлай акъара, -куну.
Хъиривмур кьини цIан -чаннаву ивзун лавгун ур ялавай.
Га чIумал МахIаммадлул къушгу, ганил чIарав къаттагу лавсун бивкIун бур Кисловрайн.
Ца -кIива зурувун Лаккуяту увкIсса адиминал бувсун бур МахIаммадлухь Ханичал бакIрачIан бувкIмуния, цуппагу тания мукьах шанийн багьну бушиву.
АцIан къавхьуну, лавгун ур МахIаммад Лаккуйн.
Увцуну ур цала ппу Ханичал ци инжитшиву дурив ххал дан тайнначIан.
Душнихгу урувгун, Оьмари -ХIажинал бувсун бур арснахь ганил инжитшиву бигьа -бигьану хъин дан хьунсса дакъашиву.
-Нава хъин банна ва, -куну, МахIаммадлул бувцуну бур Ханича цащала Киславрайн.
Гикку ххуйсса, за кIулсса хIакинтурачIан занай, дару -дарманну буллай, Ханича ччаннай бацIан бувну бур, амма ца шинавун га хъиннува къашай хьуну, шанийн багьну бур.
ХIакинтурал, ганий уран -цIуцIаву хьуну дур куну, бувсун бур.
Букъав къабивтун бур МахIаммадлул Ханича хъин бан, амма ххассал бан къавхьуну бур.
Ханичал кIурукъатлий Гьуйннал хъами бивкIун бур ганиха зума тIий:
Ччаврил ччувччу Ханичай,
Гьаттавунгу гьанссарав,
Вил хIавтIлил кьянкьа ххялчIив
ЦIарал къаччуччинссарив?
Яру Муккурив ливчIсса,
Чурх Чаргаснаву ливчIсса,
Пардав цIарал ччурччусса,
Гьуйннал хIаллил кIалахIий.
Вил тIуллугу асланъя,
Махъругу ттеркьукьивъя,
Гьайбат ятIул мусилъя,
Щарнил чинилул ссихьуй. ..
ЧIявусса шаммарду бувну бивкIун бур Гьуйннал душваврал Ханичаха, вай ттухь бусласисса Гьидаятлун циняв дакIний бакъая.
Гания мукьах ххюра -ацIра шин хьуну дур МахIаммадлул, я Лаккуйн къаукIлай, я щарсса къадуцлай.
Цаярва мюрщими уссурваврангу дурцуну, ссурвалгу щар хьуну мукьах, цачIава Къарачайнаву уссал усттарталну зузисса Къюллул ЦIувкIратусса Дивирхъул тIисса жагьилтурал ссу СахIибат бувцуну бур ахиргу.